Uncategorized

पुण्यनगरीकार मुरलीधर शिंगोटे यांचे निधन

पुणे :‘पुण्यनगरी’ वृत्तसमूहाचे संस्थापक-संपादक मुरलीधर (बाबा) शिंगोटे यांचे 6 ऑगस्ट २०२० ला दुपारी एक वाजता त्यांचे जन्मगाव असलेल्या गायमुखवाडी तालुका जुन्नर येथे निधन झाले. त्यांच्या पश्चात पत्नी, तीन मुले, तीन मुली, सुना, नातवंडे असा परिवार आहे. त्यांच्या पार्थिवावर जन्मगावी सामाजिक अंतर राखण्यासंबंधी नेमून दिलेल्या नियमांचे पालन करून अंत्यसंस्कार होणार आहेत.

पुणे जिल्ह्यातील जुन्नर तालुक्यातील आळेफाटा या छोट्याशा गावातून जगण्यासाठी तोंडी लावण्यापुरती वाचन आणि लिखाण करण्यासाठी शाळा शिकलेला एक मुलगा मुंबईला जातो. सुरुवातीला पडेल ती कामे करून उदरनिर्वाह करतो आणि त्यातूनच वृत्तपत्र वितरणाची कामे करतो. हळूहळू स्वत:ची वृत्तपत्र एजन्सी सुरू करतो आणि अल्पावधीतच आपले नाव मराठी, गुजराती, हिंदी, इंग्रजी या वृत्तपत्रांच्या वितरणात मोठे करतो. ते नाव म्हणजे मुरलीधर अनंता शिंगोटे. गिरगावात त्या काळात जुन्नरच्या दांगट नावाच्या व्यक्तीची वितरण एजन्सी होती. या दोन जुन्नरकरांनी त्या काळात अख्ख्या मुंबईची वितरण व्यवस्था ताब्यात घेतली. दक्षिण भारतातील इनाडू, गुजरात मधील गुजरात समाचार, संदेश यांसह डझनभर वृत्तपत्रांची वितरणाची एजन्सी ताब्यात असलेल्या मुरलीधर शिंगोटेंनी(बाबा) 80-90 च्या दशकात महाराष्ट्रातील वितरण क्षेत्रात आपला दबदबा निर्माण केला होता.

वृत्तपत्र क्षेत्रातील अनुभवाची शिदोरी ताब्यात असलेल्या मुरलीधर शिंगोटेंना आपलेही एखादे दैनिक असावे, याबाबतचा विचार मनात झुंजी घालू लागला. त्यानुसार त्यांनी ‘मुंबई चौफेर’ हे टॅबोलॉईड सायंदैनिक सुरू केले. त्यानंतर ‘आपला वार्ताहर’, ‘पुण्यनगरी’, ‘हिंदमाता’, ‘कर्नाटक मल्ला’ ही दैनिके कोणतेही भांडवल पाठिशी नसताना फक्त वाचकांच्या जोरावर मुरलीधर शिंगोटे बाबांनी सुरू केली. यातील पुण्यनगरी दैनिक महाराष्ट्रातील वृत्तपत्र क्षेत्रातील मैलाचे दगड ठरले. पश्चिम महाराष्ट्र, मुंबई, उत्तर महाराष्ट्र, मराठवाडा, विदर्भ याठिकाणी दैनिक ‘पुण्यनगरी’च्या जिल्हावार आवृत्त्या आहेत. खपाच्या दृष्टिकोनातून ‘पुण्यनगरी’ आपला स्वतंत्र असा वाचकवर्ग तयार केला आहे. या दैनिकाने अल्पावधीतच यश संपादन केले. हे केवळ मुरलीधर शिंगोटे यांच्या अनुभवामुळेच. ‘साधी राहणीमान आणि उच्च विचारसरणी’ हा नियम शिंगोटे बाबांनी तंतोतंत पाळला. एवढ्या मोठ्या वृत्तपत्राचे मालक असूनसुद्धा बाबांनी खोट्या व बेगडी प्रसिद्धीला कधीच थारा दिला नाही. बाबांनी आपल्या कार्यकर्तृत्वाचा मराठी वृत्तपत्र सृष्टीमध्ये ठसा उमटवला. मराठी भाषिक वृत्तपत्रांसोबत इतर भाषिक दैनिक प्रकाशित करणारे मुरलीधर शिंगोटे हे एकमेव होते. ‘पुण्यनगरी’ वृत्तसमूहाचे संस्थापक-संपादक मुरलीधर (बाबा) शिंगोटे यांचे 6 ऑगस्ट २०२० ला दुपारी एक वाजता त्यांचे जन्मगावी गायमुखवाडी तालुका जुन्नर येथे निधन झाले. त्यांच्या पश्चात पत्नी, तीन मुले, तीन मुली, सुना, नातवंडे असा परिवार आहे. त्यांच्या पार्थिवावर जन्मगावी सामाजिक अंतर राखण्यासंबंधी नेमून दिलेल्या नियमांचे पालन करुन अंत्यसंस्कार होणार आहेत.